බිම නොතෙමා චූ කරපු හොරා - The Amazing Thief

අපේ පිය රජ්ජුරුවන්ට කොන්ක්‍රීට් වැඩපලක් ඇත. ඒකේ ඉතින් ඔය එක එක ඒවා විකුණන්නේය. මේ ලග දවසක ඉදන් වැඩපොලේ කම්බි බාර්, මිටි, කියත්, බල්බ් වගේ පොඩි පොඩි ඒවා නැතිවෙන්න පටන් ගත්තේය. අපේ මව්තුමිය වැඩකරන අයියලාවත් සැකකර කර හිටියාය. ඇයි තව වැඩපොල ලග හැමදාම හවසට ෂොට් එක ගහන එකෙකුත් ඇත. ඌවත් අපේ මව්තුමියගේ දැවැන්ත සැකයට බදුන් වූ එකෙක්ය.

අනිත් මොනවා නැති උනත් කම්බි කූරු ටික නැතිවෙද්දි වැඩකරන උන්ට වගේම අපේ ගෙදර උන්ටත් අම්බානට මල පැන්නේය. මේවා උස්සන එකා අල්ලන්න දවස් ගානක් හැංගිලා බලන් හිටියේය. ඒත් ඩයල් එකනම් අල්ල ගන්න උනේ නැත. සති දෙකක් පමණ මෙසේ ගෙවී ගියේය. 

වෙනදා මෙන්ම රජා යුව රජත් එක්ක කාටූන් බල බල හිටියේය. පෝගෝ චැනලයේ යන චෝටා බීම් කාටූනය අපේ සිත්ගත් කාටූනයයි. මිනිහගෙ වැඩකෑලි ටික පට්ටය. ඌ කවදාවත් ගුටිකන්නෙත් නැත. නමුත් හැම එකාටම ගහනවාය. ලොවෙත් කාටූන් එකය. වෙලාව හවස 6ට පමණ ඇත. මේ දවස්වල හවස 6 කියන්නේ මහ දවල් වගේය. ඉර සැගව ගොස් නැත. හොදට එලියය.  කෝල් එකක් ආවේය. ගත්තේ මලයාය.

යුවරජ: හලෝ.......  ඈ.....  තාත්තේ.......

පියරජ: හලෝ.... එහෙමද????

පියරජා දැන් ගේවටේ දුවන්නේය. කෝ මේ වාහනේ යතුර...හොද වෙලාවට යතුර කෑම මේසේ උඩ තිබුනේය. වහා යතුර ගත් තාත්තා මට කෑගැසුවේය.

දාගන්නවා ඉක්මනට ශර්ට් එකක්... අන්න හොරා වැඩපොළ ඇතුලෙලු.

අම්මා හුක්ෂු... මටත් නිකන් කොහේදෝ තිබ්බ මොරාල් එකක් ඇගට ආවේය. තාත්තා කියන පරක්කුව විතරය. මම ලොරිය ගාවය. එතකොටම වාගේ බලුතඩියාගේ හවස් වේල වන කිඹුල් තඩියා රැගෙන අම්මත් එතනය. මමත් එනවා.....අම්මත් නැග්ගේය. අපි වහාම වැඩපොලට ඇදුනෙමු. 

ඒ අතරතුර කෝල් එකේ සිද්ධිය තාත්තා කීවේය. වැඩපොල ඉස්සරහා නැන්දා එකෙක් වැඩපොලේ ඉන්නවා ගේට්ටුව අස්සෙන් දැකලාය. ඇය ඒ ක්ෂණයෙන් අපිට කෝල් එක දීලාය. 

අපේ වැඩපොල තියෙන්නේ වෙලක් අයිනෙය. ලොරිය වැඩපොලට ලංවෙනවත් එක්කම මම ලොරියෙන් බැස නියර දිගේ වැඩපොළ ඇතුලට රිංගුවෙමි. අම්මා ගේට්ටුව ලග රැක්කේය. තාත්තා අනිත් පැත්ත වැටලුවේය. අම්මා ගේට්ටුව ලගට එනකොටම මිනිහා එහා වත්තට පයිනවා මම දැක්කෙමි. මම නම් හිතුවෙම මිස් උනා තමා කියලාය. වෙලාවට පියරජා ඩයල් එක අල්ලගෙනය. අඩෝ නැවතියන්...කියා කෑගහගෙන මම පස්සෙන් දුවද්දි තාත්තා උගෙ බෙල්ලෙන් අල්ලගෙන ඇදගෙන ආවේය. 

යුධ සැලැස්ම

අයියෝ හොරාය. මේකා හෙන පොඩි එකෙක්ය. ඕන්නං මගෙ වසය ඇතිය. තාත්තා දැන් මූට නෙලන්න හදන්නේය. 

පියරජ: කියපිය තෝ මොනවද ගත්තේ?

හොරා: අනේ නෑ මාමේ... මම මොකුත් ගත්තේ නෑ...

පියරජ: එහෙනම් තෝ මේක ඇතුලෙ මොකද කලේ?

හොරා: මම... මම... මම ලැට් එකට ගියේ...

පියරජ: ඇයි තොට වෙන ඒවා ඇත්තෙම නැද්ද යන්න... උඹ අර පාර අයිනේ ඉදන් මේ කෙලවරේ තියෙන එකටම ආවා? වරෙන් යන්න බලන්න.

තාත්තා මූවත් ඇදගෙන වැසිකිළිය වෙත ආවේය. අපිත් දැන් පස්සෙන්ය.

පියරජ: කෝ තෝ දැන මේකේ මොකද කලේ? වතුර ගහලද? කෝ මේක තෙමිලා...

හොරා: මම.... චූ කරන්න ආවේ...

පියරජ: තෝ චූ කරා නම් කෝ මේකේ පාරක්වත්... ඇත්ත කියපන්....

මට දැන් බකස් ගාලා හිනා යන්න එන්නේය. මම බොහෝම අමාරුවෙන් තද කරගෙන හෙන මරුමුස් ලුක් එකක් මවාගෙන සිටියෙමි. මව්තුමියත් ගොරවන්න ගත්තේය.

මව්: ඇත්ත කියනවා... පොලිසියට අල්ලලා දෙන්න කලින්....

හොරා: අනේ නැන්දේ... පොලිසියටනම් කියන්න එපා...

මූ නෑ........ම කියන්නේය. වැන්දේ නැති ටික විතරය. හෙන වෙලාවක් මූව බය කිරීමෙන් අනතුරුව මූ ඇත්ත කිව්වේය. මූ උස්සපු බඩු ඔක්කොම සල්ලි පොලියට දෙන එකෙක් ගාවට දීලාය. ඌව අපේ තාත්තත් හොදට අදුරන්නේය. උගේ නම නිලමෙය.  තාත්තා හොරාවත් ඇදගෙන ඌ ලගට ගියේය. දුන්න බඩු ඔක්කොම ආපහු ගත්තේය. හොර මල්ලා කියන විදිහට මූ ඒ බඩු උස්සලා තියෙන්නේ උගේ කීමටය. 

හොරා ප්‍රාදේශිය සභාවේ කුණු ලොරියේ වැඩකරන එකෙක්ය. ඌ හැමදාම වැඩපොළ ඉස්සරහින් යන එකෙක්ය. අපේ අම්මා ඌට පට්ට දඩුවමක් දුන්නේය. 

මව්: මෙච්චර කාලෙකට මේ වැඩපොලේ එක ගල්කැටයක් නැති උනේ නෑ...ආයේ මොනවාහරි නැතිඋනොත් තමුසෙව තමා අල්ලගන්නේ....ඊලග දවසේ ඉදන් තමුසේ පාරේ යනකොට වැඩපොල පැත්තෙන් යන්න බෑ...මෙතනදි පාරෙන් එහා පැත්තට පැනලා ඒ පැත්තෙන් යන්න ඕනේ. මේ පැත්තෙන් ගියෝත් අඩු කැඩෙන්න ගහනවා...

හොරා: හා... නැන්දේ හා...

සිද්ධිය එසේ අවසන් විය. දන්න කියන හැමෝම කිව්වේ ඌව පොලිසියට අල්ලලා දෙන්න කියලාය. ඒත් අපේ තාත්තා කිව්වේ ඌ පොඩි එකෙක් හින්දා සමාව දුන් බවය. අනික ඌ එතන වැද වැටුන විදිහට ඌට තාත්තා ගැහුවෙත් නැත. 

මෙදාම උදේ පට්ට සිද්ධියක් වෙලා ඇත. අර නිලමේ කියන එකා නියර දිගේ යන්න ඇවිත් ඇත. එතන බැදලා හිටපු එළදෙන මූට අනින්න එලවලාය. වැඩකරන අයියලා කෑගැහලා ඌව බේරා ඇත. අපේ අම්මානම් කියන්නේ ඒ අපිට ඉගියක් දුන්නා කියලාය. නැත්තන් ඔතනින් කීදෙනෙක් ගියාද... මූටම අනින්න පැන්නේ???

ප/ලි:

ඔන්න කට්ටියට කොන්ක්‍රීට් බඩු, පෙරසවි ස්ලැබ්ස් (අඩු වියදම්), ගොඩනැගිලි කොන්ත්‍රාත් එහෙම තියෙනවනම් අපේ පියරජා අමතන්න ඈ...

*** මෙය මුදල් ගෙවා ප්‍රචාරය කරන ලද දැන්වීමකි. 

එකෙක් බඩු ගන්න ආවා... :)

පුංචි දගකාරියේ....ලු :)

සුභ වේවා!!! රාජ සම්පත් ලැබේවා!!!