නූල්බෝල හොරා

රතු නැන්දා එහාට දුවනවා මෙහාට දුවනවා. හරිම කලබලේ

ඒ සද්දෙට කළු මාමත් දුවගෙන ආවා. මොකද්ද මේ වෙලා තියෙන්නෙ කියලා බලන්න.

මගේ අළුත්ම නූල් බෝලේ...කෝ..ඒක නෑ...මේ දැන් මෙතන තිබුනා...පුදුම වැඩක්නේ මේක..ඉතින් මං දැන් කොහොමද මගේ චීත්තේ මහගන්නේ... රතු නැන්දා තාමත් කෑගහනවා.

කෑගහන්න එපා යෝදියේ...අහල පහල මිනිස්සුන්ටත් ඇහෙයි...නූල් බෝලේ දැන් තිබුනානම් නැති වෙන්නේ කොහොමද? අපි තව ටිකක් හොයලා බලමු...

හොයලා බැලුවා තමයි..කෝ...ඒත් නූල් බෝලෙට වෙච්ච දෙයක් නෑ..

කළු මාමයි...රතු නැන්දයි දෙන්නත් එක්කම නූල් බෝලේ හොයනවා. උඩ බලනවා...බිම බලනවා.ඒත් නෑ. නූල් බෝලේ හොයලා කළු මාමටයි රතු නැන්දටයි දැන් හොදටම මහන්සියි. කළු මාමා නළල දිගේ බේරෙන දාඩිය ඔලුවේ බැදගෙන හිටපු ලේන්සුවෙන් පිහ දාගෙන බංකුව උඩින් ඉදගත්තා

මේකනං පුදුම වැඩක්... දැන් කොච්චර වෙලාවක් නම් හෙව්වද? හැබෑටම බහිරවයවත් ගෙනිච්චද දන්නේ නෑ... රතු නැන්දා ඇස් දෙකත් ලොකු කරගෙන නිකටටත් අත තියාගෙන බිත්තියට හේත්තුවෙන ගමන් කිව්වා.

ඔය අතරේ ක කළු මාමා දැක්කා අද යට නූල් පොටක් එහාට මෙහාට ඇදෙනවා. කළු මාමා හෙමින් සැරේ ඇද යටට එබිලා බැලුවා... කළු මාමාට හිනා. රතු නැන්දත් පුදුම වෙලා බලාගෙන ඉන්නවා කළු මාමා හිනා වෙන්නේ මොකද කියලා. රතු නැන්දා කළු මාමාගෙන් ඇහුවා වෙන්නේ මොකද කියලා... ඒ ගමන කළු මාම තවත් හයියෙන් හිනාවෙන්න පටන් ගත්තා. රතු නැන්දට දැන් කළු මාමා එක්කත් තරහයි.

හිනායන්නැතුවයි...මේ තියෙන්නේ ඔහේගේ නූල් බෝලේ...මේ ඉන්නේ බහිරවයා. නූල්බෝල හොරා... එහෙම කියලා කළු මාමා ඇද යට ඉදලා එළියට ගත්තේ කිටියව.උගෙ ඇග පුරාම නූල් එතිලා. ඌ නූල් බෝලේ අරගෙන එහාට මෙහාට පෙරළි පෙරළි ඉදලා නූල් බෝලේ ඇග පුරාම එතිලා.

ඇගපුරා එතිච්ච නූල් පිටින්ම කිටියා පුරු...පුරු ගගා කළු මාමගේ කකුලේ දැවටෙන්න පටන් ගත්තා. දැන් නම් රතු නැන්දට හොදටම තරහයි. කේන්තිය ඉවසාගෙන ඉන්න බෑ..

හොර බළලා.. දැන් ඉතින් නූල් බෝලේ ගන්න දෙයක් නෑ.. ඒ මදිවට කකුලේ දැවටෙන්නත් එනවා.. හිටපං උඹට හොද පාඩමක් උගන්නන්න...

එහෙම කියලා ගෙයි තිබිච්ච කොස්සත් අරගෙන රතු නැන්දා දුවගෙන ආවා. එතකොටත් කිටියා මිදුලට පැනගෙන.

_______________________________________________

ප/ලි:
මේ දවස් වල හවසට හිටගෙන පශ්චාත්භාගය/ඵුඛ හෝදන්නට වහින්නේය. ඒ මදිවට තඩි හෙනද පාත්වෙන්නේය. කරන්ට් එක එක්ක වැඩ මව්තුමිය තහනම් කරන බැවින් මටත් කරන්නට දෙයක් නැත. පොත් රාක්කය ඇද්දෙමි. උසස්පෙල පොත් වලින් අච්චාරුවක් දැම්මෙමි. කතන්දර පොත් ඇද්දෙමි. මාගේ පළමු කතන්දර පොත හම්බුනේය. සාලෙට ඇවිත් ආසාවෙන් පොත කියෙව්වෙමි. මේ අතර අම්මා ලගින් ගියේය. 

මම - අම්මේ මේ...... මම පොත පෙන්නුවෙමි.

අම්මා - හිහ් හිහ්... ඉස්සර ඔය පොත මට පාඩම්. ඇයි ඉතින් හැමදාම රෑට ඕක කියවන්න ඕනැනේ

මම - හිකිස්.. ^_^

ඉස්සර මාගේ ආසම කතන්දර පොත මේකය. අම්මාට පින්සිදු වෙන්නට ඒ හැම පොතක්ම වාගේ මා සතුව ඇත. 

පිටකවරේ

තඩි අකුරු

කොහොමද චිත්‍ර හැකියාව

රචනය: ධම්මිකා අක්මීමන

පැල්පොලවත්ත

ගොඩගම

මීගොඩ

ප්‍රථම මුද්‍රණය - 1995 ජනවාරි    

සුභ වේවා!!! රාජ සම්පත් ලැබේවා!!!